Nakumpleto na ang rehabilitasyon sang Paliwan Bridge nga amo ang nagakonekta sa southern kag northern areas sang probinsya sang Antique.
Suno kay Antique District Engineer Bernadeth Betsy Uy, nagapadayon na lamang subong ang pagpinta sa railings kag pag-install sang pavement markings sa taytay.
Sa Hunyo 5, lauman nga buksan na ini liwat sa publiko agud mas mapahapos na ang byahe sang mga motorista.
Ini nga taytay ang tuman ka importante sa mga Antiqueño bangud gina-angot sini ang banwa sang Lauan sa naaminhan kag banwa sang Bugasong sa nabagatnan.
Sang Oktubre 2022, sa kasagsagan sang Bagyo Paeng, nag-collapse ang duha ka spans sini sa Barangay Cubay North sa Bugasong. Sang amo nga tion, ginhimuan na lamang sang temporary access road sa idalom sang taytay agud may agyan man ang mga tawo.
Sa structural rehabilitation, ginhimo na ini nga tatlo ka spans kag naggamit sang P70 million halin sa quick response fund sang Department of Public Works and Highways (DPWH).
Ini nga rehabilitasyon ang kasunod sang mandu ni President Ferdinand R. Marcos Jr. sang nagbisita ini sa Antique sang nagligad nga tuig kun sa diin ginsugo sini sa DPWH nga dapat durable kag indi sub-standard ang taytay.
(Photo: AA Legarda)
