Napilian ang Tony Award-winning singer kag Broadway star nga si Lea Salonga nga latest celebrity nga iga-immortalize bilang Madame Tussauds wax figure.
Ginsapubliko ini sa social media pages sang Madame Tussauds Singapore, Hunyo 5.
“Shining, Shimmering, Splendid! The legendary Lea Salonga will have her very own wax figure in #MadameTussaudsSH! Are you as excited as we are?” kabahin sang caption.
Kasunod sang pagpakita sang behind-the-scenes sa paghimo sang wax figure, ginsiling naman sang Filipino icon nga isa ka “absolute honor”, “privilege”, kag “fantastic” nga eksperyensya nga madugang siya sa mga personalidad nga may wax figure.
Magluwas sa local productions kag projects, kilala si Lea sa musicals sa Broadway sa New York kag sa West End sa London.
Nangin star siya sa Miss Saigon, Les Misérables, Once on This Island, kag ang pinakaulihi amo ang Here Lies Love nga may apat ka Tony Award nominations lakip ang Best Choreography, Best Sound, Best Original Score (Music and/or Lyrics) Written for the Theater, kag Best Scenic Design of a Musical.
Ang 53-anyos man nga singer-actress amo ang singing voice sa likod sang Disney princesses nga sanday Jasmine kag Mulan.
Ang iban pa nga mga Pinoy nga may Madame Tussauds wax figures amo ang boxing legend nga si Manny Pacquiao, Miss Universe titleholders nga sanday Pia Wurtzbach kag Catriona Gray, kag ang aktres nga si Anne Curtis.
