Nagtapos sa isa ka trahedya ang kuntani masadya nga paghampang kag pagpaligo sa ulan sang tatlo ka kabataan sa Pulilan, Bulacan sang lunsay sila ginpang-igu sang kilat kag lunsay man ginbawian sang kabuhi.
Ginkilala ang mga biktima nga amo sanday Rexter Enriquez, 16, Roxanne Enriquez, 12, kag April dela Cruz, 11. Ginpahayag nga magpakaisa ini nga mga biktima.
Suno sa isa pa nila ka pakaisa, nagahampang sila sang bola sang gulpi lang nagpangilat kag pagbalikid sini, wala na sang pangalibutan ang iya mga kaupdanan.
Gindali-dali pa dala sa ospital ang kabataan apang wala gid natabangan kag ginpangbawian gid sang kabuhi.
Suno sa state weather bureau nga Philippine Atmospheric, Geophysical and Astronomical Services Administration, posible nga “ground current” sang kilat ang nag-igu sa magpakaisa.
Nahibaluan nga mabaskog ang pagbubo sang ulan sa Bulacan kag madamo nga parte sang Pilipinas sang nagligad lamang nga inadlaw nga dala na sang habagat suno pa sa PAGASA.
Photo: Eric Apostol Suarez
