ILOILO CITY- Nagapangatubang subong sang reklamo ang isa ka jeepney driver matapos nga ginpapanaog niya ang isa ka babaye nga pasahero bangud matambok ini.
Natabo ini sa Parañaque City.
Suno sa tagreklamo nga si Joysh Gutierrez, nagsakay ini sa Baclaran-Sucat nga jeep apang ginpapanaog siya sang driver bangud sa iya panglawason.
Mangin ang asawa sang driver nga yara man sa jeep ang nag-insulto man sa pasahero.
Wala man nagpanaog ang pasahero kag gin-apinan man ini sang iban pa nga pasahero sa jeep.
Sa pihak sini, nagpadayon ang driver sa pagpamilit nga papanaugon ang pasahero bangud nga ma-flat ang royda sang jeep nga duha pa lang ka semana matapos nila ini ginbakal.
Pahayag pa sang pasahero, normal na sa iya nga ma-bully, apang malala ang iya naagyan sa driver kag asawa sini.
Ginpa-blotter naman ni Gutierrez ang insidente sa Parañaque Police.
Nagpaandam naman ang Land Transportation Franchising and Regulatory Board nga ginadumilian ang pagpili sang pasahero ang mga driver sang mga pampubliko nga transportasyon.
