Ginpasalig ni President Ferdinand Marcos, Jr. nga dal-on sa Djibouti kag pangitaan sang paagi nga mapabalik sa Pilipinas ang Pinoy seafarers nga sakay sa MV Tutor nga gin-atake na naman sang Houthi rebels sang Yemen samtang nagalayag ini sa southern Red Sea kag Gulf of Aden.
Sa video message sang presidente, ginsiling sini nga nagapakig-angot na ang gobyerno sang Pilipinas sa United Kingdom Maritime Trade Operations. Suno kay Marcos, himuon sang gobyerno ang tanan para nga mabuligan ang apektado nga mga Pinoy crew.
“Sa ating mga kasama na Filipino seafarers na nakasakay nung MV Tutor na binomba at ngayon ay hindi malaman ang gagawin – lahat ng maaring gawin ay ginagawa na namin… Patuloy ang aming paghanap ng tulong sa ating mga kaibigan para madala na kayo sa Djibouti,” pahayag sini.
Una na nga gin-ako sang pro-Iranian Houthi group nga naka-base sa Yemen nga sila ang responsable sa small watercraft and missile attacks nga rason kun ngaa naguba ang engine room sang nasambit nga Greek-owned cargo ship kag nagpangayo sang rescue samtang malapit sa Red Sea port of Hodeidah.
Una na nga ginkondena sang DFA ang panibag-o nga atake sang Houthi rebels sa MV Tutor apang wala sini ginsapubliko kun pila ka Pilipino ang nadalahig sa amo nga insidente.
Sa separado nga report ni Migrant Workers Secretary Hans Leo Cacdac, ini nga barko ang may sakay nga 22 crew members kun sa diin mga Pinoy ang kadam-an kag may isa pa ka Filipino crew nga kumpirmado nga missing.
Halin sang Nobyembre 2023 pa sang nagsugod ang Houthis sa pag-atake sa international shipping sa amo nga ruta bilang pag-unong sa Palestine nga subong halos mapudpod na bangud sa gyera sang Israel kag Hamas.
