ILOILO CITY – Lauman sang mga nasunugan sa Tanza Bonifacio kag Rizal Estanzuela, Iloilo City Proper ang madamo nga mga financial assistance halin sa national government.
Sa interview sang Bombo Radyo kay Iloilo City Lone District Rep. Jamjam Baronda, iya ginpahayag nga nagpadala ini sang sulat sa National Housing Authority (NHA) agud magpangayo sang ayuda sa mga nasunugan.
Magluwas diri suno kay Baronda, nakigkita man siya sa opisyal sang Department of Finance sa diin ginpasalig ini nga mahatagan sang ayuda ang mga nasunugan sa tion nga makumpleto na ang dokumento halin sa Iloilo City Government.
Suno kay Baronda, depende pa sa available nga pondo ang mabaton nga ayuda.
Una diri, nakapangayo naman si Baronda sang ayuda kay House Speaker Ferdinand Martin Romualdez sa diin P10,000 ang ginhatag sa mga totally burned kag P5,000 naman sa partially burned.
