Gin-report sang Ministry of Health nga walo ka tawo ang nasamaran kasunod sang 7.2 magnitude nga linog nga nagtay-og sa southern Peru.
Sandig sa anunsyo sang ahensya, lima sa pilason ang ginapangdatan na sang pagbulong sa duha ka mga ospital sa Ica region samtang tatlo naman ang yara sa Arequipa region nga pareho nga nahamtang sa southwestern Peru.
Wala naman sang kumpirmasyon nga may napatay suno kay Prime Minister Gustavo Adrianzen.
Suno sa United States Geological Survey, natabo ang linog 8 kilometers (5 miles) sa nakatundan sang Atiquipa kag ginabanta 600 kilometers (372 miles) sa nabagatnan sang capitalnga Lima.
Una na nga nagpaguwa ang Pacific Tsunami Warning Center (PTWC) sang alert warning sang “possible” tsunami waves nga magalab-ot sa 1-3 metros sa mga baybayon sa Peru, apang sang ulihi ginbawi man amo nga paandam.
Ang Peru kag kaangay man sa kadam-an sa South American Pacific Coast ang nahamtang sa border sang duha ka tectonic plates: ang South American plate kag ang Nazca plate.
