May plano ka bala nga mag-biyahe sakay sa eroplano subong nga Hulyo?
Maayo nga balita bangud may pagnubo sa airfare subong nga bulan bangud man sa pagbuhin sang fare surcharge.
Suno kay Civil Aeronautics Board (CAB) administrative division OIC Clarabel Anne Lacsina, ang ginpanubo nga world market prices para sa fuel amo man ang nagtulod sa Civil Aviation Authority of the Philippines (CAAP) nga panubuon ang fuel surcharges sa Level 5 halin sa 6.
Sa idalom sang level 5 fuel surcharges, yara na lang sa P151 tubtub sa P542 ang range sa domestic flights. Sa international flights, ang fuel surcharges ang magatupa sa P498 tubtub sa P3,703.
Ang fuel surcharge ang isa ka optional fee nga ginapasa sang airlines sa mga pasahero agud nga ma-recover ang ila ginbayaran bangud man sa volatility sang jet fuel. Lain ini sa base fare.
Ini nga surcharge ang nakasandig sa movement sang jet fuel prices sa international market.
Gin-report man sang CAB nga mas mabaskog ang air travel demand subong nga 2024 ipaanggid sang 2023.
“Ang total domestic passengers natin ngayon ay nasa 7.4 million na siya at ang international naman ay nasa 6.9 million kumpara po noong 2023 ng first quarter din po. So, patuloy po na sana po makikita pa tayo nang patuloy na pagtaas ng bilang ng ating mga pasahero lalo na po na bumaba ang ating fuel surcharge na nagta-transmit na ng lower fares po,” kabahin sang statement ni Lacsina.
