Naghimo sang daku nga upset si Coach Tim Cone kag ang world no. 37 nga Gilas Pilipinas paagi sa paglutos sa world no. 6 kag host nation nga Latvia, 89-80, sa imbukada nga hampang sini sa 2024 FIBA Olympic Qualifying Tournament.
Wala naka-apekto sa performance sang nationals ang pagsinggitan sang Latvians para sa European squad sa ila mismo home floor sa Riga bangud sa pag-umpisa pa lang sang hampang, nagbubo na sang 8-0 lead ang Pilipinas.
Ginpasagunsunan sang Gilas ang abanse kag nakalab-ot pa sa 26 puntos ang gap tubtub nga nabatian ang final buzzer nga amo ang nagkibot sa European team nga amo ang gintawag nga “giant killer” kag fifth placer sa FIBA Basketball World Cup sa Manila sang nagligad nga tuig.
Naghampang ang Latvians nga wala ang ila superstar kag newly-crowned NBA champion nga si Kristaps Porziņģis sang Boston Celtics bangud nagpaidalom ini sa surgery.
Nagpanguna naman sa kadalag-an sang Pilipinas ang naturalized import kag ginabansagan nga Gilas hero nga si Justin Brownlee nga may near triple-double nga 26 points, 9 rebounds, kag 9 assists.
Apisar bataon pa, ginpamatud-an man ni Kai Sotto nga indi ini mag-atras sa Europeans paagi sa pagpaulan sang 18 points kag 8 rebounds.
Dugang diri, 12 points, 7 rebounds, kag 4 assists ang nahimo ni Dwight Ramos; nagtipon si June Mar Fajardo sang 11 points, 5 rebounds, kag 3 steals; samtang si Chris Newsome ang nakabubo man sang 10 points.
Naka-posisyon na ang Gilas sa 1-0 nga record sa Group A apang kinahanglan pa sini dag-on ang ikaduha nga hampang batok sa Georgia 8:30 karon sa gab-i (oras sa Pilipinas).
Antes sini, ginlutos na ang Latvia ang Gergia, 83-55, sang Martes.
Pagkatapos sang group stage, ang duha ka nagapanguna nga teams ang maga-abanse sa crossover semifinals agud maatubang ang Group B nga nagalakip sang Brazil, Montenegro, kag Cameroon.
Ang winner lamang sang OQT amo ang makakuha sang highly-coveted nga ticket para sa Paris Olympics.
