Amat-amat na nga ginahitso ang mga kinahanglan i-saylo sang Department of Health (DOH) – Western Visayas kasunod sang pag-separar sang Negros Occidental sa Rehiyon VI kag pag-upod na sini sa bag-o lang na-aprubahan nga Negros Island Region (NIR).
Sa interview sang Bombo Radyo kay Dr. Adriano Subaan, director sang DOH – Region 6, iya ginpahayag nga lakip sa iga-turn over amo ang Corazon Locsin Montelibano Memorial Regional Hospital nga nagaisahanon nga tertiary hospital sa bug-os nga Negros Island kag isa sa pinakadaku sa ospital sa bilog nga pungsod.
Ang opisina sang health department sa amo nga rehiyon ang ipahamtang sa Dumaguete City, Negros Occidental.
Ang magapamuno sa amo nga regional health office nga magasakop sang Negros Occidental, Negros Oriental, kag Siquijor, amo si Dr. Razel Nikka Hao nga nangin director anay sang DOH-Region II.
Dugang ni Subaan, naka-courtesy call na si Hao sa mga gobernador kag mga alkalde sang NIR.
Sa bahin sang mga personnel sang DOH-VI, ginsiling sang director nga napahibalo na ang plano halin pa sang Disyembre 2023 agud nga makonsiderar ang mga plano bangud nga kalabanan sa naga-trabaho sa health offices sa Negros ang halin pa sa Panay partikular sa Iloilo.
Sandig sa timeline suno kay Hao, mangin fully-operational na ang regional office sa NIR sa masunod nga tuig bangud may yara na sang pondo.
Nahibaluan nga magluwas sa DOH, ang mga ahensya nga magabutang man sang regional offices sa Bacolod City
kag Negros Occidental amo ang Department of Agriculture, Department of Environment and Natural Resources, Department of Agrarian Reform, Department of Human Settlements and Urban Development, Department of Justice, Department of the Interior and Local Government, Philippine National Police, Department of National Defense, Department of Budget and Management, Department of Finance, National Economic and Development Authority, Department of Foreign Affairs, Commission on Audit, kag Commission on Elections.
Sa pagpirma ni President Ferdinand Marcos Jr. sa NIR Act agud dalayon nga mangin layi sang Hunyo 13, nakasaad nga ang rehiyon ang mangin “bulwark of greater growth” kag “conduit” para sa mas epektibo nga paghatag sang essential services para sa mga pumuluyo.##
