ILOILO CITY – Tinguhaan sang Western Visayas nga mangin overall Champion sa 2024 Palarong Pambansa.
Ang host sang hinampang subong nga tuig amo ang Cebu City.
Sa interview sang Bombo Radyo Bacolod kay Mr. Hernani Escullar, Jr., public information officer sang Department of Education Region 6, iya ginpahayag nga nakahanda na ang tanan nga mga delegado sang rehiyon agud dal-on pauli ang kampyonato.
Sang 2023 Palarong Pambansam nakuha sang National Capital Region ang kampyonato sa diin ang Western Visayas ang 1st runner-up kag 2nd runner up naman ang Region IV-A ukon CALABARZON.
Suno kay Escullar, ang Western Visayas ang ginabug-usan sang 933 ka mga delegado.
Sa nasambit nga numero 601 ang mga atleta sa diin 214 ang Elementary, 346 ang Secondary kag 41 naman sa Para Games.
Samtang ang coaches, assistant coaches and chaperones ang yara sa 136 kun sa diin 50 diri ang halin sa Elementary, 73 sa Secondary kag 13 sa Para Games.
96 naman ang mga myembro sang management committee.
Subong nga adlaw, Hulyo 7, nag-umpisa na ang refresher course sa University of San Carlos-Main.
Bwas, Lunes, patigayunon ang solidary team meeting nga pasakupan sang mga team coaches ka technical officials sa diin istoryahan ang tournament guidelines kag schedule sang mga hinampang.
Patigayunon naman ang Opening Ceremony sa Martes, Hulyo 9, sa diin ginalauman nga magatambong diri sanday President Ferdinand Marcos Jr. kag Vice President Sara Duterte.
Sa Hulyo 11, patigayunon ang simultaneous games kag sa Hulyo 15, patigayunon naman ang championship games.
Opisyal naman nga magatakop ang Palarong Pambansa sa Hulyo 16.
