Nagsungka na sa pulis ang main organizer sang preacher’s event sa India kun sa diin natabo ang stampede nga ginkamatay sang 121 ka mga tawo sang nagligad nga semana.
Ini amo si Devprakash Madhukar nga ginhingadlan nga key suspect sa initial report sang pulis bangud sa attempted culpable homicide.
Antes ang iya pag-surrender, nag-anunsyo ang pulis sang reward nga $1,200 ukon P70,000 para sa makahatag sang impormasyon para maaresto ang amo nga organizer.
Matandaan nga ang Hindu religious event sang nagligad nga Martes ang gintambungan sang 250,000 ka mga tawo sa northern state sang Uttar Pradesh. Ini apisar yara lamang sa 80,000 ang ginpahanugutan sang district authorities.
Magluwas sa mga napatay nga kalabanan mga babaye kag kabataan, masobra man sa 80 ang nasamaran kag gin-admit sa mga ospital.
