Nagdugang pa ang aktor kag major Hollywood fundraiser para sa Democrats nga si George Clooney sa pagpanawagan kay US President Joe Biden nga mag-atras na sa kampanya sini para sa reelection subong nga 2024.
Si Clooney ang isa sa nag-host sa star-studded fundraiser para kay Biden sa Los Angeles sang bulan sang Hunyo nga halos duha ka semana antes nahuy-an ang 81-anyos nga presidente bangud sa pigado sini nga performance sa presidential debate batok sa Republican presumptive nominee kag anay President Donald Trump.
Pahayag ni Clooney nga nagalaragway sa iya kaugalingon bilang “lifelong Democrat”, indi na pareho si Biden sa ginpakita sini nga performance sang 2020.
Nagapati ang natungdan nga indi na magdaog ang Democrats sa Nobyembre kun si Biden ang kandidato, magluwas pa nga indi man sini maangkon ang House kag madula man pati sa ila ang Senado.
Ginbuyagyag pa ni Clooney nga indi lang ini iya kaugalingon nga opinyon bangud amo man sini ang opinyon sang mga myembro sang Kongreso kag mga gobernador nga iya naistorya sang pribado.
Una na nga gin-ako ni Biden nga apektado sang iya edad ang iya debate performance, apang nagpromisa ini nga magapadayon siya sa kandidatura kag indi ini mag-atras kay Trump bisan sa ikaduha nga presidential debate sa Septyembre.
