Nagsabat na ang host-actor nga si Luis Manzano kasunod sang wala-tuo nga mga pamangkot kun nagapabatyag na bala ini sa Batangas kag kun may plano man nga magsulod sa pulitika.
Sang nagligad nga adlaw, spotted si Luis kaupod ang iya stepfather nga si Finance Secretary Ralph Recto nga nagtambong sa isa ka political event sa San Juan, Batangas. May pictures pa kun sa diin kaupod sang duha si President Ferdinand Marcos, Jr.
Bangud nagahilapit na lang ang filing sang certificates of candidacy, may mga espekulasyon nga magapadalagan man si Luis kaangay sa iya iloy — ang Star for All Seasons nga si Vilma Santos nga nagpungko anay bilang alkalde, kongresista, kag gobernadora sa Batangas.
Nangin lahog naman ang sabat ni Luis sa mga naga-tag sa iya: “Kung sakali po na ako ay tatakbo, umaambon pa lang, may ayuda na agad. HAHAHAHAHAHA LARO.”
Sang ulihi, gin-klaro sini nga nagtal-os lamang siya sa iya iloy para sa amo nga event sang Hulyo 12: “Nag-represent kay Momski lang muna.”
Dugang sini, wala pa naistoryahan sa ila pamilya ang pulitika, bangud subong suno sa iya, masako pa siya sa bag-o nga TV show nga Rainbow Rumble.
Matandaan nga sa contract signing sini sa Kapamilya network sang nagligad lamang nga Hulyo 2, nagsabat ang TV host nga indi sini pagsiraduhan ang posibilidad sa pagsabak man sa pulitika ukon serbisyo-publiko sa masunod nga mga tinuig.
