Nagdangat sa 71 ka Palestinians ang ginbawian sang kabuhi sang gin-atake sang Israel ang isa ka designated humanitarian zone sa Gaza agud kuntani patyon ang military chief sang Hamas nga si Mohammed Deif.
Sa report sang Gaza health ministry, ginsaad nga magluwas sa mga napatay, 289 ka mga tawo ang nasaraman.
Natabo ang atake sa Al-Mawasi, ang lugar nga amo ang ginsiling sang Israeli army nga kadtuan sang Palestinians matapos nga ginpahalin sila sa mga lugar nga ila anay gintiniran.
Sa statement sang militante nga grupo, ginsiling nga patalang lang ang rason sang Israel nga gin-target sini nga mga lider sang Hamas bangud luyag lang sang militar nga i-justify ang ila ginhimo nga pagpang-atake.
Apang nanindugan ang Israeli military nga ang strike batok kay Deif ang nag-target man kay Rafa Salama, ang commander sang Khan Younis Brigade sang Hamas. Ginsiling man sang Israel nga ang duha ka nasambit nga pangalan amo ang masterminds sa Oktubre 7 nga pagpang-atake sa southern Israel nga amo ang nag-resulta sa pagtimalos sang Tel Aviv kag siyam na ka bulan nga gyera sa Gaza.
Ini na ika-pito nga tuyo sang Israel nga patyon si Deif apang iya gihapon nalusutan. Nagapangibabaw siya sa Most Wanted list sang Israel sa sulod na sang pila ka dekada kag siya man ang ginatudlo nga rason sang kamatayon sang madamo nga Israelis bangud sa suicide bombings.
(Photo: Reuters)
