Magagamit ang kapulisan sang anti-drone guns agud nga masigurado gid ang safety sang House of Representatives sa Quezon City kun sa diin natalana nga mag-deliver si President Ferdinand Marcos, Jr. sang iya ikatatlo nga State of the Nation Address (SONA) sa Lunes, Hulyo 22.
Suno kay Quezon City Police District director Brig. Gen. Redrico Maranan, nagbakal sila sang tatlo ka state-of-the-art anti-drone guns nga sarang maka-shoot down sang military grade nga drones.
Wala na sini ginpatpat ang detalye sa specs kag ano nga sahi ini sang drones bangud sa security reasons.
Sandig sa pagsulundan, may no-fly zone sa sulod sang 10-kilometer radius sa Batasang Pambansa complex sa Lunes gani iga-shoot down ukon iga-disable ang makit-an nga drones nga magalapas sa sini nga regulasyon.
Gin-athag sang pulis nga kabahin lamang sang precautionary measures ang ila pagbakal sang anti-drone guns kag wala ini nagakahulugan nga may security threat na nga na-monitor antes ang okasyon.
Umpisa buwas, Hulyo 21, ibutang na sa full alert ang police units sa Metro Manila. Sandig sa pinakakaulihi nga update sang otoridad, yara sa 23,000 ang iga-deploy nga police and government security elements kadungan sang SONA matapos nga nag-augment man ang 1,000 ka dugang nga mga personnel.
