Nagsaka na sa 33 ang tally sang congressional Democrats ang nagpanawagan kay President Joe Biden nga mag-atras na sa iya kampanya nga magpa-reelect bilang presidente sang Estados Unidos sang Amerika.
Magluwas pa ini sa grupo sang masobra 50 ka former U.S. foreign kag national security officials nga nagpanawagan sa 81-anyos nga Democrat leader nga indi na pagdayunon ang iya kandidatura — lakip na si Anthony Lake nga anay national security advisor ni former President Bill Clinton.
Ginsaad sang grupo nga ang mga isyu nga nagapalibot kay Biden kag ang daku nga tyansa sa electoral college victory para kay Donald Trump amo ang rason nga mabutang sa risgo ang national security accomplishments kag mga legasiya sang Democrats.
Masobra naman sa 14% sang Democratic House caucus ang nagsiling nga gusto nila ang lain nga nominee nga magaatubang kay Trump nga amo na ang opisyal nga presidential candidate sang Republicans.
Nahibaluan nga naka-isolate subong si Biden sa iya beach house sa Rehoboth, Delaware matapos nagpositibo sa Covid-19 infection apang ginpahayag nga nag-improve na ang kondisyon sini magluwas lamang sa ginasuprer pa sini nga pag-ubo.
