ILOILO CITY- Natapos na ang imbestigasyon nga ginpatigayon sang Cooperative Development Authority Central Office may kaangtanan sa anomaliya nga ginakaulamiran sang Iloilo City Government Employees Multipurpose Cooperative.
Matandaan nga nabutang sa kontrobersiya ang nasambit nga kooperatiba bangud sa reklamo sang mga myembro nga ang mga opisyal kag board of directors ang nagpinagusto sa ila loan nga nagresulta sang dako nga financial losses bangud sa loan transactions nga nagabalor P31 million.
Sa interview sang Bombo Radyo kay Undersecretary Joseph Encabo, Chairman sang Cooperative Development Authority, iya ginpahayag nga indi pa mapaguwa sa publiko ang resulta sang imbestigasyon bangud nagapakig-angot pa ang regional office sa legal department sang central office para sa final stage sang pag-review sang findings.
Suno kay Usec. Encabo, indi niya makabig nga delayed ang investigation bangud may gina-obserba ang ahensya nga due process.
Posible subong nga tuig makapaguwa na sang desisyon ang Cooperative Development Authority.
Nanindugan si Encabo nga may yara sang may manabat ukon mapasakaan sang kaso depende sa bug-at sang ebidensya.
Nahibaluan nga nalakip sa imbestigasyon sang Cooperative Development Authority amo si Nora Patron, ang anay regional director sang ahensya nga gindeklara nga “persona non-grata” ni Iloilo City Mayor Jerry Treñas.
