Ginbasura sang Iran ang panawagan sang Western countries nga indi na magtimalos sa Israel kasunod sang pag-atake man sang amo nga pungsod kag pagpatay sa political leader sang Hamas nga si Ismail Haniyeh sang nagligad nga bulan.
Suno kay Iranian foreign ministry spokesperson Nasser Kanani, indi nila matuman ang amo nga request bangud kulang ini sa political logic kag nagasumpakil pa sa pagsulundan sang international law.
Gin-report man nga ginprangka ni Iranian President Masoud Pezeshkian si British prime minister Keir Starmer nga ang paghipos sang West sa mga krimen sa Gaza kag mga pagpang-atake sang Israel sa Middle East ang isa ka iresponsable nga aktwasyon kag amo pa ang nag-gatong sa Israel nga ibutang sa risgo ang regional kag global security.
Nahibaluan nga Israel man ang ginabasol sang Iran sa asasinasyon kay Haniyeh sang Hulyo 31 samtang nga yara ini sa Tehran.
SaLebanon, may strike man ang Israel kun sa diin ginpatay man ang senior commander sang Hezbollah nga isa man ka gamhanan nga militante nga grupo nga suportado man sang Iran.
Bilang suporta sa Israel, matandaan nga nagpadala na ang White House sang fighter jets, anti-missile warships kag guided missile submarine sa Middle East agud mabuligan ang pungsod pananglitan magbalos ang Iran kag ila nga mga kaalyado.
Matandaan nga sang Abril, duha man ka heneral sang Iran ang napatay sa missile strike sang Israel sa embassy sang Tehran sa Syria rason nga nagbalos ang Iran kag nagpaulan sang ginatos ka drones, cruise missiles kag ballistic missiles sa Israel rason man nga nahalitan ang duha ka airbases.
Halos tanan nga ginpadala sang Iran ang ginpatibusok man sang Israel antes nalab-ot ang ila nga mga target.
Lakip sa ginalantaw sang mga eksperto amo nga mas epektibo ang balos sang Iran subong ipaanggid sang Abril kag possible nga magapabulig ini sa ila proxies sa Lebanon, Iraq, Yemen kag Gaza.
Ginalantaw ugaling nga tanan ini sa axis of resistance sang Iran (magluwas sa Hezbollah) ang ginakulang sa abilidad agud magbilin sang seryoso nga halit sa Israel.#
