Ginpakamalaot ni anay Presidente Rodrigo Duterte ang lihok sang pulis nga nagsulod sa Kingdom of Jesus Christ compound sa Davao City sa tuyo nga dakpon ang wanted nga pastor nga si Apollo Quiboloy nga nagapangatubang sang human trafficking kag sexual abuse cases.
Sa statement ni Duterte nga suod nga abyan kag kaalyado ni Quiboloy, ginsiling sini nga nagapalab-ot siya sang simpatiya sa mga miyembro sang kingdom nga biktima sang political harassment, persecution, violence, kag abuse of authority.
Partikular nga ginpakamalaot ni Duterte si Brigadier General Nicolas Torre III, director sang Police Regional Office XI, nga amo ang nagpanguna sa operasyon.
Nagpanawagan man ang anay presidente sa mga nabilin nga “decent and patriotic members” sang gobyerno nga indi pagtugutan nga gamiton sila para nga magpang-abuso kag mangin bayolente sa pagpatuman sang mga mandu.
Si Senador Christopher “Bong” Go nga kaalyado ni Duterte ang nagkondena man sa ginhimo sang uniformed personnel kag naglaragway man sa operasyon nga isa ka “overkill”.
Suno naman kay Senador Imee Marcos, utod ni President Ferdinand Marcos, Jr., “unwarranted kag unjustified” ang 2,000 ka mga police personnel nga ginpadala sa compound.
Indi man mabaton suno sa senadora ang kahadlok kag ang reported nga napatay bangud sa pwersa sang otoridad batok sa mga naga-estambay lang sa lugar nga nagapangapin kuntani sang ila kinamatarong.
Nagdepensa naman si Torre nga wala sang “overkill” bangud sa pagkamatuod suno sa iya, kulang pa ang 2,000 ka mga personnel bangud nga tuman ka daku ang compound kag indi madasig pangitaon ang pastor.
Kadam-an pa sang mga pulis suno sa iya ang nagabantay lamang sa guwa kag nagapatunga sa mga sumulunod nga amo ang nagasabad sa otoridad nga nagahimo sang operasyon.
Sa personal naman nga pagkadto ni anay PNP chief kag subong Senator Ronald Bato Dela Rosa sa compound, gonpahayag sini nga ginpahangop niya kay General Torre nga indi sila makatinir sa kingdom bangud nga isa ini ka pribado nga propiedad kag kinahanglan nga tapuson na gilayon ang operasyon.
Apang nagpanindugan si Torre nga kinahanglan nila makit-an kun sa diin nagahalin ang pitik sang korason nga ma-detect sang ila dala nga heartbeat detector test 20 metros below the surface.
Nagpanawagan man si Bato kay Quiboloy nga magsungka na lang bangud may yara sang warrant ang mga pulis kag indi man ini makapanago sa iya bilog nga kabuhi.
Pasado alas singko kahapon sang kaagahon, Agusto 24, sang nagsugod ang operasyon sang mga pulis sa amo nga compound.
