Ginalantaw sang Sugar Regulatory Administration (SRA) nga mahimo mangin paborable para sa produksyon sang kalamay sa Pilipinas ang ginapaabot nga La Niña weather phenomenon apang depende sa timing.
Suno kay SRA administrator Pablo Luis Azcona, kun matabo ang weather phenomenon sa last quarter sini nga tuig nga magasanto sa forecast sang state weather bureau, magadungan ini sa period kun sa diin nagatubo ang mga tubo.
Kun nagaulan suno kay Azcona, mas magalaba ang tubo bangud bastante ang tubig.
“It will increase the tonnage and hopefully, our sugarcanes will grow longer because it has enough water,” pahayag sini. “With the rains coming, if La Niña comes, hopefully we can recover.”
Base sa Philippine Atmospheric, Geophysical and Astronomical Services Administration (Pagasa), magaporma ang La Niña sa tunga-tunga sang Septyembre kag Nobyembre kag magalawig tubtub sa una nga quarter sang 2025.
Base sa draft sugar order, ang sugar output para sa crop year 2024-2025 ang mahimo makadangat sa 1.78 million metric tons (MT) nga kun matabo, 7.4 percent gihapon nga mas manubo ipaanggid sa 1.922 million MT sang kalamay nga na-produce sang crop year 2023-2024.
Ginabasol sang SRA ang manubo nga estimate bangud sa negatibo nga epekto sang malawig nga El Niño phenomenon nga rason kun nga nagtanum liwat ang sugarcane farmers.
Una na nagpasiguro ang SRA nga bastante pa ang suplay sang kalamay tubtub sa katapusan ang milling season sa Mayo ukon sa Hunyo 2025 apisar pa nga gina-project nga may pagnubo sa produksyon.
