Gintumod ni Interior Secretary Benhur Abalos nga si anay Negros Oriental representative Arnolfo Teves Jr. ang ila masunod nga target matapos nagmadinalag-on na nga madakpan si dismissed Bamban, Tarlac mayor Alice Guo kag napasungka ang pugante nga pastor nga si Apollo Quiboloy.
Si Teves amo ang ginatudlo nga suspek sa pagpapatay kay anay Negros Oriental Governor Roel Degamo sang 2023 sa Pamplona sa amo nga probinsya.
Napasakaan man ini sang kaso sa pagpatay sa tatlo ka tawo sa Negros Oriental sang 2019.
Napaidalom ini sa kustodiya sang Timor Leste police halin sang Marso matapos nadakpan bangud sa Red Notice nga ginpaguwa sang International Criminal Police Organization (Interpol) sang Pebrero.
Sa Dubai, gin-istorya ni Abalos kun paano nakuha sang Pilipinas ang duha ka high-profile nga mga pugante — si Guo sa Tangerang City, Indonesia sang Miyerkules sang nagligad nga semana samtang si Quiboloy naman sa KOJC compound sa Davao City kahapon sang hapon, Septyembre 8.
Una naman nga ginpahayag ni Department of Justice (DOJ) spokesperson kag assistant secretary Mico Clavano nga nagapakig-angot na ang ahensya sa Department of the Interior and Local Government (DILG) kag sa iban pa nga ahensya bangud gusto man ni Timor-Leste President Jose Ramos-Horta nga ibalik si Teves sa Pilipinas.
Una na nga ginpahayag ni Clavano nga ma-execute ang extradition kay Teves kun matapos na ang pagbisita ni Pope Francis sa amo nga pungsod sa Septyembre 9-11.
