ILOILO CITY – Ginkumpirma sang kampo ni former Iloilo City Mayor Jed Mabilog nga nakig-angot na ini sa National Bureau of Investigation agud magsungka sa kaso niya nga graft antes paman ini nagbalik sa Pilipinas.
Sa interview sang Bombo Radyo kay Atty. Jeric Jucaban, legal counsel ni Mabilog, iya ginpahayag nga naghatag na sang “surrender feeler” ang anay alkalde nga boluntaryo ini nga magsungka sa mga otoridad kag atubangon ang kaso kriminal nga ginpasaka sa iya.
Gin-ako man ni abogado ni Mabilog nga sang yara ini sa luwas sang pungsod, naghingyo nini sang ‘Political Asylum’ sa gobyerno sang United States of America kag gin-grant man.
Suno kay Jucaban, nag-isyu ang Lapu-Lapu City Regional Trial Court Branch 73 kag Sandiganbayan Third Division sang arrest warrant batok kay Mabilog bangud sa paglapas sa “Code of Conduct and Ethical Standards for Public Officials and Employees” kag “Anti-Graft and Corrupt Practices Act.”
Nag-file ang Office of the Ombudsman sang graft charges batok kay Mabilog kag kay former Iloilo City Councilor Plaridel Nava II sang 2023 bangud sa ginapahayag kahilabtanan sa paghatag sang kontrata sa isa ka towing services firm sa diin may yara ang mga ini sang kaangtanan.
Base sa criminal information nga gin-file sang government prosecutors, nagsulod sanday Mabilog kag Nava sa memorandum of agreement kaupod ang 3L Towing Services agud magpatigayon sang clamping kag towing sa mga salakayan nga iligal nga naga-park sa syudad.
