ILOILO CITY – Emosyonal si anay Mayor Jed Patrick Mabilog kadungan sang pagpauli sini sa Iloilo City.
Nahibaluan nga pito ka tuig nga nagtinir ang anay alkalde sa Estados Unidos matapos ginpahog nga patyon ni former President Rodrigo Duterte.
Sa exclusive interview sang Bombo Radyo kay Mabilog, iya ginpahayag nga gintuman lang niya ang iya pasalig nga magabalik ini sa Iloilo City nga natabo kadungan sang iya 59th birthday subong nga adlaw.
Suno kay Mabilog, madugay niya nga ginhulat nga makapauli sa Iloilo City sa diin pinakauna sini nga ginbisitahan ang Dominican Sisters sa Avanceña Molo, Iloilo City kag nagtambong sa misa sa St. Anne Parish.
Wala naman napunggan sang anay alkalde nga maghibi kadungan sang pagbisita sini sa lulubngan sang iya nagtaliwan nga iloy nga si Melchorita sa Molo Cemetery.
Nagpauli naman ini sa iya balay sa Tap-oc, Molo, Iloilo City sa diin nag-atubang ini sa mga myembro sang media kag sa iya mga supporters.
Nagapasalamat man ang anay alkalde sa administrasyon ni President Ferdinand Marcos, Jr. sa diin tuman ang pagsalig sini sa iya seguridad.
Ginlaragway man ni Mabilog si Marcos nga isa ka maayo kag patas nga chief executive.
