Ginapabaskog pa sang Iloilo Police Provincial Office (IPPO) ang intelligence monitoring sini kag mga lihok agud nga mapunggan ang posible nga mga krimen sang criminal gang samtang nagahilapit ang 2025 elections.
Sa interview sang Bombo Radyo kay Director Police Colonel Bayani Razalan, iya ginpahayag nga may isa ka existing criminal gang sa probinsya nga ginaangot sa mga robbery-hold up incidents.
Apisar ang gun-for-hire ang masami ginagamit sa mga krimen sa eleksyon, wala nagakumpyansa ang police force suno kay Razalan bangud ang mga grupo nga nagatutok sa robbery-hold up ang may mga armas man gihapon kag posible man nga magamit sa mga kalakasan.
Sa latest monitoring sang talatapan, yara sa Palawan kag Zamboanga ang lokasyon sang lider sang amo nga grupo subong.
Ginpahayag man sini nga amat-amat na nga narumpag ang amo nga grupo sa probinsya bangud ang iban sa ila ang napatay na samtang nadakpan naman ang iban nga kaupdanan.
Ginklaro man sini nga criminal gang lamang ang ila nga na-monitor kag wala sang organized crime group.
Nahibaluan nga base sa record sang Regional Intelligence Division, may apat ka criminal gangs sa Western Visayas nga amo ang isa halin sa Iloilo kag tatlo halin naman sa Negros Occidental.
Ini nga mga grupo ang yara sa target list for operations sang Police Regional Office 6 kag ang iban sa ila nga mga miyembro ang may yara na sang pending nga arrest warrants.
