Nag-init ang ulo ni Senador Ronald “Bato” dela Rosa sang ginkompronta niya sa hearing sang Senate Committee on Women and Children si Mary Ann Maslog nga ginpahayag involved sa 1998 textbook scam kag nagpakuno- kuno nga patay.
Sa hearing, ginpahayag ni dela Rosa nga may yara siya nga nakuha nga A1 information nga may taga- Malacanang nga naggamit kay Maslog para kumbinsihon si dismissed Bamban Mayor Alice Guo nga magpirma sa isa ka affidavit nga magatum-ok sa senador, kay anay Presidente Rodrigo Duterte, Senador Christopher “Bong” Go kag anay PNP CIDG Chief Major General Romeo Caramat sa Philippine Offshore Gaming Operators ukon POGO.
Pahayag sang senador, nagbisita si Maslog sa PNP Custodial Center, kun sa diin nakahunong si Guo para papirmahon ang anay alkalde sang affidavit.
Si Maslog ang naga- claim nga gin- recruit ini sang Philippine National Police (PNP) nga mag- contact kay Alice Guo sang tion nga nagpalagyo ini.
Gin-ako naman ni PNP Intelligence Group chief P/Gen. Romeo Macapaz nga gin-gamit nila si Maslog para makahimo sang koneksyon kay Guo sang nagapanago ini sa Indonesia.
Ginkumpirma man ni Macapaz nga isa siya sa mga nagbulig nga makasulod si Maslog sa PNP Custodial Center.
