Indi makatambong si former President Rodrigo Duterte sa hearing sang House quad comm buwas sa aga, Oktubre 22, apisar una naman sini ginhangkat ang apat ka mga committee sa Kamara nga imbitaron siya agud magsabat sa isyu sang war on drugs kag extrajudicial killings.
Sa sulat sang iya legal counsel nga si Atty. Martin Delgra III kay House QuadComm lead chairman kag Surigao del Norte lawmaker Ace Barbers, ginrason sini nga indi maayo ang pamatyag ni Duterte subong.
Magluwas diri suno sa iya, short notice ang nahatag sa ila.
“Unfortunately, despite his keen intention to attend, my client respectfully manifests that he cannot attend the public hearing set on 22 October 2024. Aside from the short notice given to him, my client just arrived in Davao from Metro Manila last 17 October 2024,” suno kay Delgra.
Ginpahayag pa sini nga bangud sa edad sang former president, kinahanglan gid sini nga magpahuway kun indi maayo ang iya pamatyag.
“Considering his advanced age and the several engagements he had to attend, he is currently not feeling well and is in need of much rest. Hence, my client respectfully requests to defer his appearance before the Honorable Committee scheduled tomorrow,” dugang sang abogado.
Apang dugang sini, mahimo gid makatambong si Duterte sa masunod nga hearings sang quad comm particular na pagkatapos sang Nobyembre 1.
Nahibaluan nga nagsulat ang quad comm kay Duterte sang Oktubre 18 agud nga imbitaran ini agud maghatag sang kasanagan sa mga isyu nga gina-istoryahan particular ang extra-judicial killings.
Ang quad comm amo ang apat ka House committees nga ginabug-usan sang dangerous drugs, public order and safety, human rights kag public accounts.
Diri na-implicate si Duterte sa ginaalegar pagpamatay sa tatlo ka Chinese drug lords sa Davao Prison and Penal Farm sang Agusto 2016. Mismo ang former warden kag ang hitman ang nag-ako sini, apang ginpanginwala ini sang kampo sang former president kag gintawag nga political attacks.
Ang self-confessed drug lord nga si Kerwin Espinosa ang nag-testify man sa atubang sang quad comm kag nagpahayag nga nagapati siya nga si Duterte ang nagpaguwa sang kill order batok sa iya amay nga si former Albuera Mayor Rolando Espinosa nga ginpatay sa Leyte detention sang 2016.
Paagi man sa quad comm, gin-implicate man si Duterte bangud sa ginaalegar paghatag sini sang rewards sa mga pulis nga makapatay sang drug suspects, apang ginpanginwala man niya ini paagi sa pagsiling nga wala sang matarong nga pulis nga magasulod sa kaangay nga kasugtanan.#
