Ginpatawag sang South Korea ang Russian ambassador sa Seoul kag ginhingyo nga ipaalinton ang ila mensahe nga dapat mag-withdraw ang tropa sang militar nga ginpadala sang North Korea sa Russia agud magbulig sa gyera batok sa Ukraine.
1,500 ka mga soldado sang North lakip na ang halin sa special forces ang nag-abot na sa Moscow santo sa report sang spy agency sang Seoul.
Sa meeting kay ambassador Georgiy Zinoviev, ginsiling ni South Korean vice-foreign minister Kim Hong-kyun nga indi maayo ang amo nga tikang kag nagpaandam man nga magasabat diri ang Seoul gamit ang ila tanan nga available nga mga lihok.
Ginpaathag sini nga ini nga tikang ang pamahog na sa seguridad sang international community kag isa ka maathag nga paglapas sa mga resolusyon sang UN Security Council kag UN Charter.
Nagpanindugan naman ang ambassador nga ang ginhimo sang Moscow kag Pyongyang ang sulod pa sa framework sang “international law”.
Nahibaluan nga may dugang nga impormasyon ang spy agency sang South Korea nga may dugang pa gid nga tropa nga ipadala ang North bilang bulig ni North Korean leader Kim Jong Un kay Russian President Vladimir Putin.
Antes sini, madugay na nga gina-insister sang South nga ang North ang naga-suplay man sang mga armas sa Russia nga ginagamit sini batok sa Ukraine.
Base sa impormasyon sang Seoul, ang una nga batch sang North Korean soldiers nga halin sa elite unit sa idalom sang Special Operations Forces ukon “Storm Corps” ang naka-estasyon na subong sa military bases sa Far East sang Russia.
Ginalantaw nga ini nga special forces ang iga-deploy sa front lines sang gyera batok sa Ukraine kun matapos na nila ang ila pag-adjust kag training.#
