May isa na naman ka achievement ang aktor nga si Gerald Anderson sa guwa sang showbiz industry matapos gin-promote ini bilang auxiliary captain sa Philippine Coast Guard Auxiliary (PCGA).
Ginpatigayon ang donning kag oath-taking ceremony sa BRP Teresa Magbanua.
Lakip sa nagtambong sa seremonya amo ang iya girlfriend nga si Julia Barreto nga nag-congratulate man sa iya paagi sa Instagram stories.
“More than the rank, it’s just being here with amazing people. Na-recognize tayo ng idol natin sa ganitong sitwasyon and circumstances, di ba? Si Senator Robin Padilla pa yung nag-pass ng resolution for this to happen,” suno sa actor.
“It’s always good to be here with the Philippine Coast Guard, nakapagbigay tayo ng high morale sa kanila, pinaparamdam natin sa kanila na we appreciate them,” pahayag pa sini.
Antes sini, nangin aktibo si Gerald sa pag-upod sa rescue operations halin pa sang Bagyo Ondoy sang 2009 tubtub sa mga bagyo subong nga 2024.
Nagabulig man siya sa Aeta community sa Zambales kag sa naga-recover nga mga pamilya sa Marawi kag nangin masako man sa pag-donate sang medical supplies kag tents sa kasagsagan sang COVID-19 pandemic.
Sang Agusto, si Anderson nga isa man ka Army reservist ang ginkilala sang Philippine Coast Guard (PCG) kag ginhatagan sang “search and rescue medal” bangud sa iya daku nga bulig sa pag-rescue sa mga na-trap bangud sa Bagyo Carina.
