Nagpahanumdom liwat ang Department of Social Welfare and Development (DSWD) nga indi paghingalitan ang relief operations para sa pulitika.
Ini kasunod sang lima ka sunod-sunod nga mga bagyo ang na-eksperyensyahan sa lain-lain nga parte sang Pilipinas sa sulod lamang sang tatlo ka semana.
Suno kay Asec. Irene Dumlao, spokesperson kag assistant secretary for Disaster Response and Management Group sang DSWD, bastante pa ang ila nga family food packs para sa mga apektado sang malain nga panahon apang kuntani suno sa iya, indi ini paggamiton sang local officials nga magapadalagan sa 2025 elections.
Naangot ini sa mga report nga may mga sticker nga ginapangtapik sa food packs kun sa diin nakabutang ang mga pangalan kag laragway sang mga pulitiko.
Bilang kabahin sang protocol sang DSWD, gina-release ang food packs sa LGUs nga apektado sang bagyo kag ginatugyan na sa LGUs ang pagpanagtag sini sa mga nahalitan.
Sa idalom man sang pagsulundan, dapat nga may yara gid sang DSWD social worker nga present sa kada distribution sang sini nga family food packs.
