Nabayluhan sang kasubo ang kalipay sang driver sang Ceres Bus nga nagaselebrar sang iya kaadlawan subong nga adlaw, Nobyembre 24, matapos masunog ang ginamaneho sini nga bus sa Barangay Tabucan, Cabatuan, Iloilo.
Ang driver amo si Christopher Ison, 49, residente sang banwa sang Janiuay.
Sa interview sang Bombo Radyo kay Fire Officer 3 Daryl Talamera, imbestigador sang Cabatuan Fire Station, iya ginpahayag nga ‘las 7:22 sang gab-i sang nakabaton sila sang tawag nga may nasunog nga isa ka bus nga may byahe nga Pavia terminal padulong sa Calinog.
Gindeklara naman ini nga fire out ‘las 7:47 sang gab-i kun sa diin gintinguhaan pa kuntani ini nga palungon sang konduktor kag driver ang kalayo gamit ang fire extinguisher.
22 ang sakay sang bus dala na ang driver kag konduktor. Maswerte nga wala may nasamaran sa insidente bangud gilayon nga nakagwa ang mga ini.
Base naman sa inisyal nga imbestigasyon, naghalin sa nauna nga bahin sang bus ang kalayo apang padayon pa sa gihapon ang imbestigasyon sang Cabatuan Fire Station.#
(By: Bombo Phauline Pillora)
