Ginklaro ni Manila 3rd District Rep. Joel Chua nga wala sang istoryahanay sa Kamara nga iimpeach si Vice President Sara Duterte.
Ini nga klaripikasyon ang kasunod sang naglapta nga report kahapon nga ginaalegar nagpadala sang text message si President Ferdinand Marcos Jr. sa House leaders nga nagatulod sa ila nga mag-file sang impeachment complaints batok kay Sara.
Suno kay Chua, wala siya sang nabaton nga komunikasyon nga amo sini halin sa liderato sang Kamara.
“Hindi ko pa po alam yan,” suno kay Chua sa isa ka press conference. “Wala naman po akong nare-receive na communication from House Leadership.”
Gin-ugyunan ni Zambales Rep. Jay Khonghun ang statement ni Chua nga wala pa sang diskusyon kaangot sa impeachment sa bise-presidente, apang suno kay Khonghun, posible nga indi mapunggan ang iban nga mga kongresista nga suportahan ang kaangay nga mga tikang.
“Well, wala tayong kasiguraduhan kung saan nga po nanggaling yung text messages na iyan pero kung ang pinag uusapan ay impeachment, lahat naman ng tao may karapatan na mag file ng impeachment at siguro nasa kanya-kanyang konsensiya na yan ng mga bawat miyembro ng Kamara kung susuporta sila sa impeachment na may magpa-file…” suno sa mamalidha.
Mismo si Sara ang nagpalutaw nga target gid sang Marcos administration nga kakason siya sa pwesto. Una naman nga nagpaguwa sang statement ang presidente kag nagsiling nga indi man importante si Sara gani indi kinahanglan ang impeachment complaints bangud iga-distract lamang sila sini sa pagtrabaho sa gobyerno.
Subong nga adlaw kuntani ang hearing sang House committee kaangot sa confidential funds ni Sara apang indi ini anay pagdayunon.
Ginpaathag ni Chua nga hatagan nila sang ligwa ang National Bureau of Investigation (NBI) nga nag-require sang presensya ni Sara subong nga adlaw agud magsabat kaangot sa iya “kill order” batok sa president, first lady, kag house speaker.
