Pormal na nga ginpasaka sa “Cardinal of the Catholic Church” ang ranggo ni Bishop Pablo Virgilio David, ang presidente sang Catholic Bishops’ Conference of the Philippines (CBCP).
Ginpatigayon ang consistory ceremony ukon ang Ordinary Public Consistory for the Creation of New Cardinals sa St. Peter’s Basilica sa Vatican.
Sa seremonya, ginhatagan si David sang cardinal ring, tube nga naga-unod sang dokumento nga naga-proklamar sang iya status, kag may yara man sang pula nga biretta ukon square nga kalo nga amo ang ginpasuksok sa iya.
Si David ukon kilala sang madamo bilang si Bishop Ambo amo na ang ika-10 nga Filipino cardinal nga kaupod na nanday Cardinal Jose Advincula sang Manila kag Cardinal Luis Antonio Tagle nga amo man ang pro-prefect sang Dicastery for Evangelization sang Vatican.
Ang iban pa nga gin-appoint man bilang cardinal ang naghalin sa Argentina, Brazil, Chile, Peru, Italy, Britain, Serbia, Japan, Indonesia, Canada, Ivory Coast, kag Algeria.
Nalakip sa lista ang 20 ka pari nga wala pa naka-80 anyos ukon pwede nga makaboto agud nga maka-eleher sang bag-o nga Santo Papa kun mapatay ukon mag-resign si Pope Francis.
Base sa Church hierarchy, ang cardinal amo ang nagapangaduha nga rank sa Santo Papa kag amo man ang nagaserbe bilang iya pinakamalapit nga advisers.
Ang ila nga historical power kag impluwensya ang nagakahulugan nga matawag gihapon sila nga “princes of the Church” apisar una naman nagpahanumdom si Pope Francis nga dapat wala sang royalty sang Simbahan kag dapat nga magpabilin nga suod sa mga pigado.
Sila ang nagaakto nga pinaka-suod nga advisers sang Pope.
Sa ginbalhag nga interview sang Catholic Bishops’ Conference of the Philippines, ginpatpat ni Cardinal David ang mga katungdanan sa iya bag-o nga papel. Ginplastar man sini kun paano ginpadalom pa sang Diocese of Kalookan ang iya nga bokasyon kag amo ang nagporma sa iya approach sa pastoral care.
Nahibaluan nga si Bishop David ang na-eleher bilang CBCP president sang 2021 kag na-re-elect sang 2023.
Kilala siya nga vocal critic sang madinuguon nga war on drugs sang Duterte administration amo man sa red tagging.
Na-ordenahan siya bilang pari sa Archdiocese of San Fernando sang 1983, na-appoint bilang auxiliary archbishop sang amo man nga archdiocese sang 2006, kag ginsaylo sa Caloocan diocese sang 2015.
Si Bishop David ang naeleher man bilang masunod nga vice president sang Federation of Asian Bishops’ Conferences (FABC) sang February 2024 kag opisyal nga magapungko sa amo nga posisyon sa Enero 2024.
