Ginkilala sang Billboard Music Awards ang 35-anyos nga American music superstar nga si Taylor Swift bilang All-Time Top Winner matapos nalab-ot ang 49 wins sa iya bug-os nga karera sa musika.
Si Taylor na subong ang nagauyat sang pinakamataas nga record sa history sang BBMA kag ginasundan ni Drake nga may 39 wins.
Sa awards ceremony subong nga tuig, may 10 ka bag-o nga trophies si Taylor lakip na ang Top Artist, Top Female Artist, Top Billboard 200 Artist, Top Hot 100 Artist, Hot 100 Songwriter, Top Streaming Songs Artist kag Top Billboard 200.
Ini man ang ikaduha nga sunod-sunod nga tuig nga 10 ka awards ang iya nakuha halin sa BBMA.
Sang nagligad nga inadlaw lamang sang gintapos sang Grammy-winner ang iya “Eras Tour” sa Vancouver, Canada kag ginhatag man ang P11.4 billion bilang bonus sa mga tawo nga nagbulig sa iya tour sa nagligad nga duha ka tuig.
“Everything that’s happened with the Eras Tour and ‘The Tortured Poets Department,’ I just have to say thank you. It means the world to me that you guys have embraced the things I’ve made and the fact that you’ve cared so much about my music,” kabahin sang pre-recorded speech ni Taylor sa BBMA.
Marso 17, 2023 sang nagsugod ang iya tour sa Arizona, USA kag nakahapit sa 149 ka mga syudad lakip na sa Singapore kag sa Japan nga amo ang duha ka Asian stops.
