𝗜𝗟𝗢𝗜𝗟𝗢 – Nangin matam-is ang bunga sang pagpangabudlay sang isa ka iloy matapos dungan nga nakapasar ang iya duha ka mga anak sa September 2024 Licensure Examination for Professional Teachers.
Ini amo sanday Britzel Mae Escobañez Enrico kag Leila Jennifer Enrico sang Damires, New Lucena, Iloilo.
Sa interview sang Bombo Radyo kay Emros Enrico, iloy nanday Britzel Mae kag Leila Jennifer, iya ginpahayag nga sa lamrahon pa nga edad, nagbusong ini sa diin ang iya bana ang wala sang permanente nga trabaho.
Nag-angkon naman ini sang lima ka mga anak kag agud masustentuhan ang mga ini, nagdesisyon ini nga magpadulong sa Singapore, apang sa ulihi, nagpauli man sa Pilipinas bangud sa problema sa ikaayong lawas.
Nangin dako naman nga pagpanghangkat kay Britzel Mae ang pagbusong sini sang yara pa lang ini sa Grade 11 sa edad nga 17 anyos.
Apang nagapasalamat ini bangud wala ini ginpabay-an sang iya mga ginikanan sa diin ang iya iloy mismo ang nagbantay sa iya anak agud makatapos ini sa pagtuon.
Suno naman kay Leila Jennifer, madamo sang mga nagpakanubo sa ila bangud sa natabo sa iya magulang sa diin ginpromisa sini nga indi gid ini magbusong sa lamharon nga edad.
Sa baylo nga madulaan sang paglaom, nagpaninguha ini, sa diin nakatapos ini bilang Cum Laude.
Tuman naman ang ila kalipay matapos nga dungan sila nga nakapasar sang iya magulang sa pasinawan.
