Matapos ang malapit 15 ka tuig nga pagtinir sa presuhan sa Indonesia, makapauli na si Mary Jane Veloso sa Pilipinas subong nga adlaw, Disyembre 18.
Subong nga kaagahon naglupad ang eroplano gikan sa Jakarta sakay ang convicted overseas Filipino worker kag ginalauman nga magahugpa sa Manila 6:00 sang aga.
Si Veloso, 39, ang yara sa death row sa amo nga Asian country bangud sa ginaalegar nga drug trafficking matapos nadakpan nga may sulod nga 2.6 kilos nga iligal nga droga ang iya luggage sang nag-abot siya sa Yogyakarta sang 2010.
Sang Nobyembre, ginkumpirma ni President Marcos nga nakahimo na ang Manila kag Jakarta sang kasugtanan nga isaylo si Veloso sa Pilipinas.
Ang agreement nagasiling nga sayluhon siya bilang isa ka preso apang ang iya sentensiya ang itugyan na sa layi sang Pilipinas nga nagakahulugan nga si Presidente Marcos ang magadesisyon sa iya kapalaran.
Nagpabutyag naman si Veloso sang tuman nga kalipay nga magaselebrar ini sang Paskwa kaupod ang iya kabataan kag pamilya.
