Ginkalipay sang mga operators sang modernized jeepney ang pagbukas sang Ungka flyover sa full capacity subong nga adlaw.
Sa interview sang Bombo Radyo kay Mr. Raymundo Boyet Parcon, Chairman sang Western Visayas Transport Cooperative (WVTC), iya ginpahayag nga sa pila ka tuig nga pag-antos sa traffic, nangin pigado ang ila byahe, kun sa diin ang trip sang nagligad nangin 5 ang pinakataas nga trips sa kada modernized jeep sa isa ka adlaw kun sa diin, nagakita sila sang P5,000.
Suno kay Parcon, makalab-ot sa 7 trips ang mabyahe sang isa ka modernized jeepney, samtang ang may ruta Jaro CPU to Ungka terminal ang may pinakapigado nga byahe.
Naghatag man ang natungdan sang instruction sa drivers nga mangkuton anay ang mga pasahero kun may manaog sa dalom antes magsaka sa flyover kag kun wala, sa ibabaw na lang maagi.
Paagi sa pagbukas sang Flyover, gina-ekspektar nga mangin matalunsay ang byahe sang mga units kag mabuhinan ang problema sa trapiko.
Apisar nga may pag-alang-alang bangud sa mga rectification nga ila ginapamatukan, sa amo nga adlaw, gin-commend ni Parcon ang Regional Director sang Department of Public Works and Highways (DPWH) Region 6 nga si Engr. Sanny Boy Oropel.
