Tutukan sang Department of Finance (DOF) kun paano gastuhon sang Philippine Health Insurance Corporation (PhilHealth) ang ila pondo sa 2025.
Ginpahayag ini ni Finance Secretary Ralph Recto matapos ginpirmahan na ni President Ferdinand Marcos, Jr. ang P6.326-trillion national budget para sa 2025 apang gindayon gid ang desisyon sang bicameral conference committee nga zero subsidy ang ihatag sa state insurer.
Una na nakapaguwa sang statement ang ahensya nga may yara pa ini sang P280 billion sa reserve funds, P150 billion sa surplus, kag masobra P400 billion sa investments.
Puno man sang kontrobersiya ang ahensya sa 2024 lakip na ang indi pagtandog sang finances kag mga benefit packages nga wala na-update sa masobra na isa ka dekada.
“Well, my understanding is that Congress did that because the budget for… the corporate operating budget of PhilHealth is sufficient. So, they have reserved funds of roughly 280 billion [pesos]. They have a surplus of roughly a hundred fifty billion, the last time I looked at it,” suno sa tiglikom.
“They have investments of more than 400 plus billion [pesos]. They will earn 200 billion in 2025. They will spend 150 billion. So iyong surplus nila, madadagdagan na naman ng 50 billion iyan. So, they have adequate resources,” dugang sini.
Pahayag pa sini, siguruhon sang ahensya nga ma-monitor sang maayo ang PhilHealth para nga mas maayo ang ila paggamit sang budget kaangay sang pag-focus sa 10 ka nagapanguna nga balatian sa Pilipinas.
Sa iya naman speech sa ceremonial signing sang 2025 General Appropriations Act, ginsiling ni President Bongbong Marcos nga indi mauntat ang mga serbisyo sang PhilHealth bisan wala sang subsidiya halin sa gobyerno. Sa baylo suno sa presidente, mas magasangkad pa ang benepisyo nga ihatag sini sa mga Pilipino.
Sa press briefing pagkatapos sang seremonya, ginpanindugan man ni Executive Secretary Lucas Bersamin kun ano ang promisa ni Marcos. Suno kay Bersamin, pangitaan sang remedyo sang Office of the President agud ma-sustain ang Philhealth services.#
