Ginpang-tiro patay sang isa ka lalaki ang 12 ka mga tawo sa Montenegro sa Southeastern Europe antes sini ginluthang man ang iya kaugalingon.
Ginakabig ang insidente nga isa sa worst mass killings sa amo nga Balkan nation.
Ang suspek amo si Aco Martinovic, 45, nga una nagpangluthang sa apat ka mga tawo sa sulod sang restaurant sa Cetinje matapos may nagluntad nga pagpu-isay.
Sunod sini nga ginpatay ang walo ka mga tawo lakip ang duha ka kabataan kag iya mismo utod nga babaye sa tatlo ka nagkalain-lain nga lokasyon.
Tanan nga mga biktima suno sa pulis amo ang iya mga maninoy, mga abyan, kag mga tawo nga maayo man ang ila relasyon kag nakaupod pa gani niya sa pagselebrar sang New Year.
Sang na-corner na sang mga pulis, didto na kag gintiro sini ang kaugalingon kag napatay samtang ginadala sa ospital.
Ginaalegar hubog ang suspek sang natabo ini. May nauna man ini nga kaso sang 2022 matapos nakitaan sang duha ka airguns kag homemade bomb sa iya balay. Una naman ini nga napanugyanan nga magpaidalom sa psychiatric evaluation.
