Gin-anunsyo ni President Ferdinand Marcos, Jr. nga ginhatagan sang pardon ang 220 ka mga Pinoy nga napreso sa United Arab Emirates.
Ginhatag ni UAE President Sheikh Mohamed bin Zayed Al Nahyan ini nga pabor kadungan sang 53rd National Day of UAE nga gin-selebrar sang nagligad nga Disyembre 2, 2024.
”We extend our heartfelt gratitude to His Highness Sheikh Mohamed bin Zayed Al Nahyan and Prime Minister Sheikh Mohammed bin Rashid Al Maktoum, whom I also had the honor to meet, for this compassionate gesture,” kabahin sang video message sang presidente.
Pahayag naman sang Department of Foreign Affairs (DFA), ini nga pardon amo ang direkta nga resulta sang meeting ni Marcos sa iya counterpart sa UAE sang nagligad nga Nobyembre.
Sa subong ginaproseso na sang DFA kag Philippine Embassy in Abu Dhabi ang documentary kag administrative requirements sang mga Pinoy agud nga makapauli ang mga ini sa Pilipinas.
Matandaan nga may nauna na nga 143 ka mga Pinoy nga nahatagan man sang pardon kadungan sang Eid al-Adha. Una na nga ginpahayag ni Foreign Affairs Undersecretary Eduardo Jose A. De Vega nga ang ila offenses amo ang drug abuse, theft, kag immigration-related violations kaangay sang absconding kag overstaying.
