𝗜𝗟𝗢𝗜𝗟𝗢 – Indi pabor ang Committee on Public Order and Security sang Sangguniang Panlalawigan sa pagpatuman sang signal jamming sa Dinagyang Festival 2025.
Ini kasunod sang request sang Iloilo City Police Office (ICPO) nga magpatigayon sang signal jamming kadungan sang nasambit nga festival.
Sa interview sang Bombo Radyo kay Iloilo 2nd District Board Member June Mondejar, chairman sang nasambit nga komitiba, iya ginpahayag nga nagakadapat pa nga tun-an kag athagon sang maayo kun signal jamming ukon signal shutdown ang matabo.
Suno kay Mondejar, indi na sini luyag pa nga maeksperyensyahan liwat sang mga pumuluyo ang huol nga natuga sang signal jamming sa Dinagyang Festival 2023 sa diin indi lang ang Iloilo City nadulaan sang signal kundi mangin sa mga banwa sa Iloilo Province kaangay sang ang Pavia, Oton, Leganes, Santa Barbara, kag mangin ang probinsya sang Guimaras.
Pahayag niya, ang natabo sang tuig 2023 nga nagakadapat kuntani signal jamming lang ang nangin signal shutdown sa diin nagtuga ini sang problema sa mga nagatrabaho nga nagakinahanglan sang mobile internet connection.
Nagapangabay ang natungdan nga antes madesisyonan nga i-approve ang request, pasiguruhon anay nga ang maapektuhan lang sang signal jamming amo lang ang mga lugar nga may aktibidad may kaangtanan sa Dinagyang Festival.
