Suportado ni President Ferdinand Marcos Jr. on Friday ang pagtudlo sang Comprehensive Sexuality Education (CSE) sa mga eskwelahan sa pungsod.
Ginpahangop sang presidente nga tuman ini ka importante sang ginpamangkot siya kun nagakadapat bala nga padayunon ang kontrobersyal nga CSE nga gina-implementar sang mga eskwelahan sa idalom sang Department of Education Order (DO) No. 31.
Pahayag ni Marcos, kinahanglan ini sa edukasyon sang kabataan bangud nagadamo ang kaso sang teenage pregnancy ukon madamo ang bata pa apang nagatindog na nga iloy.
Kulang suno kay Marcos ang husto nga ihibalo kaangot sa pagbusong, pagtatap sa bata, kag adequate nutrition.
“These are all of the things that we need to address. And so, the teaching of this in our schools is very, very, very important,” suno sa presidente. “And to make young people, especially, knowledgeable about what are the options that are truly available to us, and what the consequences are – what the consequences are of having a child too soon, too early.”
Dugang sini, “Children having children is a very difficult situation for both the child and the parent.”
Nauna na nga ginpasigurado ni Education Secretary Sonny Angara sa publiko nga mangin “culturally sensitive” ang approach sa sex education sa public schools.
Ang CSE isa ka framework nga gina-promote sang United Nations agencies kaangay sang United Nations Educational, Scientific and Cultural Organization (UNESCO), United Nations Children’s Fund (UNICEF), kag United Nations Population Fund.
Nagatutok ini sa sexual rights-based and inclusive approach para mabuligan ang mga kabataan nga maghimo sang safe and responsible choices.
Sang nagligad nga Myerkules, nagpahayag si Sen. Sherwin Gatchalian, chairman sang Senate panel on basic education, nga plano sini nga pa-imbestigaran sa Senado ang CSE amo man ang Senate Bill No. (SBN) 1979 ukon ang Prevention of Adolescent Pregnant Act of 2023. Dala diri ang kahangawa suno sa senador nga gina-raise sang Christian community nga ang mga estudyante sa anuman nga lebel kaangay sang kindergarten ang mangin subject man sa amo sini nga sahi sang edukasyon.#
