Nagpabutyag sang pagkadismaya ang pila ka mga taxi drivers batok sa vlogger nga nag-post sang iya eksperyensiya sa pagsakay sa taxi sa Iloilo.
Sa amo nga vlog ni Mamita Lakwatsera, ginsiling sini nga makahuluya ang ginhimo sang taxi driver nga ginsukot siya sang P600 halin sa Iloilo City padulong sa airport sa Cabatuan kag wala naggamit sang taxi meter.
Sa interview sang Bombo Radyo kay Hermie Sandoval, isa man ka taxi driver, iya ginpahayag nga nagalain ang iya buot nga sa amo lang nga kantidad, gin-guba gid sang amo nga vlogger ang imahe sang mga taxi drivers.
Nagapati si Sandoval nga, intensyon na nga daan sang vlogger nga pakalainon ang mga taxi drivers sa Iloilo.
Gintuad ni Sandoval nga sang 2024, nagpadulong man diri sa Iloilo ang amo nga vlogger kun sa diin nakabais man niya ang mga taxi drivers sa Iloilo airport.
Pahayag niya, sang amo nga tion, nagbuya sang tinaga ang vlogger nga kun magbalik siya sa Iloilo, pakahuy-an niya ang mga taxi drivers.
