Nagpahayag sang pagduda si House Deputy Speaker David “Jay-jay” Suarez kaangot sa kaso nga natalana nga i-file batok kay House Speaker Martin Romualdez kag sa iban pa nga mga kongresista bangud sa gin-alegar nga iregularidad sa 2025 national budget.
Suno kay Suarez, wala sila sang gintago kag nag-agi tanan sa proseso ang General Appropriations Act antes ginpasa kag ginpirmahan ni President Ferdinand “Bongbong” Marcos Jr.
Ini nga statement ni Suarez ang ginpaguwa matapos ginkumpirma nga maga-file sang reklamo sanday former House Speaker Pantaleon Alvarez kag PDP member Atty. Jimmy Bondoc kaupod ang Citizen Crime Watch leaders nga sanday Raul Lambino kag Atty. Ferdie Topacio.
Ang natalana nga pasakaan sang kaso nga falsification of legislative documents amo sanday Romualdez, former House Appropriations Committee Chairman Zaldy Co, House Majority Leader Manuel Jose Dalipe, kag iban pa nga mga kongresista nga wala ginhingadlan.
Ginpahayag nga iga-file ang criminal complaint sa Quezon City Prosecutor’s Office buwas, Pebrero 10.
Pahayag naman ni Congressman Suarez, panahon subong ang kampanya kag gasgas na ini nga script, wala sang unod, kag lunsay lang gahod ang mabatian.
Dugang sini, dapat nga lantawon kun sin-o ang mga maga-file sang kaso nga suno sa iya ginalakipan sang balimbing nga congressman, senatoriable nga gusto masapakan, kag isa pa nga mahilig manggamo sa tion sang eleksyon.
Indi na kinahanglan ang henyo suno kay Suarez agud mapaktan kun sin-o ang tawo nga yara sa likod sang pag-file sang kaso.
Gintawag man niya ini nga diversion ilabi na bangud gin-anunsyo sang mga taga-suporta sang mga Duterte nga i-file ang kaso matapos nga na-impeach si Vice President Sara Duterte sa Kamara kag natalana nga mag-atubang sa trial sa Senado.
“At ang timing? Eksakto matapos ma-impeach si VP Sara Duterte. Malinaw, diversion lang ito. Sa halip na maglatag ng solusyon, inuuna ang demolition job. Kung gulo ang hanap nila, sana mas galingan nila script. Ginagamit ang 2025 budget bilang smoke screen—parang ginawa nilang drama noon sa confidential funds. Deflect, deflect, deflect. Pero simple lang naman di ba? Hindi pa nai-implement ang 2025 budget, may korapsyon na?,” pahayag sini.
Ginsiling man sini nga gina-abi-abi sang Kamara ang iga-file nga complaint.
“Handa ang Kongresong sagutin ang mga walang -batayang alegasyon. Pero kung layunin lang ay pulitika, hindi dapat magpaloko. Orchestrated chaos ito—hindi serbisyo,” suno kay Suarez.#
