Gin-akusaran sang isa ka pomuluyo sang Cabatuan, Iloilo sanday Mayor Elizalde G. Pueyo kag Vice Mayor Ronilo O. Caspe nga sila ang sa likod sang ginapatuman nga quarry sa Tigum River, Brgy. Salacay, Cabatuan.
Ang nag-akusar amo si Maria Fe Cabucos kon sa diin, gina-claim sang sini nga siya ang nagapanag-iya sang duta kag isa ini ka pribado.
Ginpaandaman man sini ang mga opisyal nga magapasaka sang kaso batok sa ila.
Nagpadulong man ini sa kapulisan agud magpalab-ot sang iya concern apang wala sang isa ka minuto, naghalin man ini.
Sa interview sang Bombo Radyo kay Mayor Pueyo, iya ginpahayag nga may ginakaptan sila nga gratuitous permit nga nagapahanugot man sa banwa nga magpatuman sang quarry sa amo nga lugar.
Suno kay Pueyo, gin-allow sila sang Iloilo Provincial Government Environment and Natural Resources Office (PGENRO) kon sa diin ginpirmahan ni Governor Arthur “Toto” Defensor Jr. nga yearly renewal.
Nagpanindugan man ang natungdan nga nag-agi sa legal nga proseso ang pagpahanugot sa sand and gravel quarrying sa Tigum River.
Ginbuyagyag man sini nga indi na bag-o ang alegasyon ni Cabucos bangud 2021 pa sang nagsugod ini reklamo apang tubtob subong, wala sa gihapon napamatud-an.
