Gindala si Pope Francis sa ospital para sa medical examination bangud sa ginasuprer sini nga bronchitis.
Suno sa Vatican, yara sa Agostino Gemelli Polyclinic sa Roma ang 88-anyos nga Santo Papa agud nga magpaidalom man sa kinahanglanon nga diagnostic tests.
Ginkumpirma man nga ginkanselar anay ang mga meeting sini sa masunod nga tatlo ka adlaw.
“This morning, at the end of the audiences, Pope Francis will be admitted to the Agostino Gemelli Polyclinic for some necessary diagnostic tests and to continue in a hospital setting treatment for bronchitis that is still ongoing,” kabahin sang statement.
Nahibaluan nga pila ka beses nga na-ospital ang Argentine pontiff halin sang naglinigad nga tinuig lakip na ang pagpaidalom sini sa abdominal surgery sang 2023.
Halin sang nagligad nga sinemana, nabudlayan man ini sa paghambal kag pagginhawa bangud sa bronchitis rason nga ginpalihog lamang sa aides ang iya speeches kag addresses.
Sang Miyerkules, sa iya nga weekly general audience, nagsiling ini nga indi pa siya makasarang magbasa apang nagyuhom kag nagdugang nga kabay pa nga masarangan na sini sa masunod.
Sang Biyernes sang aga, antes ini na-ospital, may mga schedule pa ini sa Vatican lakip na ang meeting sa prime minister sang Slovakia nga si Robert Fico.
Makatulublag nga isyu ang bronchitis para sa Santo Papa bangud nagsuprer na ini nga daan sang lung-related issues bisan pa sa bata nga edad.
2013 sang nangin Santo Papa si Pope Francis nga amo ang labing-una halin sa South America.
Sa edad nga 88, naga-baston na ini kag nagagamit sang wheelchair. Sang nagligad nga bulan, natumba ini kag nakaangkon sang injury sa butkon.
Nagsuprer man anay si Pope sang diverticulitis, isa ka common condition nga makatuga sang inflammation ukon infection sa colon. Sang 2021, may surgery man siya agud makakas ang parte sang iya colon.
