Nagpanawagan si President Ferdinand “Bongbong” Marcos, Jr. sa mga Pinoy nga hingalitan ang job fairs nga gina-organisar sang gobyerno paagi sa “Trabaho sa Bagong Pilipinas” initiative nga iya sang administrasyon.
Sa job fair para sa mga benepisyaryo sang Pantawid Pamilyang Pilipino Program (4Ps) sa Tagum City, Davao del Norte, ginpahayag sang presidente nga dapat nga kuhaon na lang nga oportunidad nga yara na subong sa ila atubang agud maka-trabaho kag mangin produktibo.
“Hangad ko po ang inyong tagumpay. Kakambal nito ay ang aking panawagan na sana po ay mapalawig pa ninyo ang mga pagkakataon at oportunidad na nasa inyong harapan,” pahayag sini. ”Naniniwala ako na ang bawat isa sa inyo ay may kakayahan at determinasyon upang gawing produktibo ang inyong pamumuhay.”
Gin-report man sini nga sang ginlunsar ini nga inisyatibo sang Enero, masobra sa 9,000 ka mga indibidwal ang nag-apply sa trabaho kag 1,028 ang na-hire on the spot.
Magluwas diri suno kay Marcos, nagabulig gid ini sa job seekers nga mapasulod sila sa trabaho nga santo sa ila tinapusan sa pagtuon para nga mag-angot man sa ila talento kag ikasarang.
Nahibaluan nga tuyo sang “Trabaho sa Bagong Pilipinas” program nga mapasulod sa trabaho ang mga miyembro sang 4Ps. 4.4-million household beneficiaries ang target nga mabuligan sang gobyerno subong nga tuig.
Lakip sa job vacancies nga available sa sini nga job fair amo ang customer service representative, clerk, cashier, bagger, carpenter, kag mason positions.
