Nagpasaka ang isa ka abogado sang disqualification case batok sa mag-utod nga senatorial candidates nga sanday ACT-CIS Rep. Erwin Tulfo kag Ben Tulfo kag tatlo ka iban pa nila nga mga himata.
Suno kay Commission on Elections (Comelec) Chairman George Erwin Garcia, ini nga kaso nga gin-file sang petitioner nga si Atty. Virgilio Garcia ang igatugyan sa duha ka mga division sang poll body subong nga adlaw.
Magluwas kanday Ben kag Erwin, nahingadlan man sa disqualification petition sanday ACT-CIS Rep. Jocelyn Pua-Tulfo, Quezon City 2nd District Rep. Ralph Wendel Tulfo, kag Turismo party-list nominee Wanda Tulfo-Teo.
Ginsaad sang abogado ang political dynasty bilang ground sa iya petisyon.
“WHEREFORE, it is respectfully prayed of the Honorable Commission that, after due process, respondents be declared as constituting a POLITICAL DYNASTY by express prohibition under the Constitution and are therefore not qualified as candidates to seek public office in the National and Local Elections in May 2025,” kabahin sang 21-page petition.
Ginsiling sang petitioner nga ang lima ka respondents ang lunsay himata pa gid sang incumbent senator nga si Raffy Tulfo nga suno sa iya isa ka “anomalous monopolistic concentration of political power” sa isa ka pamilya nga nagalapas sa 1987 Constitution.
Gin-cite man sa complaint ang Article II, Section 26 nga nagasaaad nga, “The State shall guarantee equal access to all opportunities for public service and prohibit political dynasties as may be defined by law.”
Ginmuno man sa reklamo ang citizenship issue sang kongresista nga si Erwin.
Matandaan nga ang Nobyembre 2022, gin-defer sang Commission on Appointments (CA) ang diskusyon sa appointment kay Erwin bilang tiglikom sang Department of Social Welfare and Development bangud sa isyu sa iya nga citizenship.
Kasunod sang hearing, gin-ako sang kongresista nga nangin isa siya ka American citizen sang 1988, apang ginpaathag sini nga nakuha sini liwat ang iya Filipino citizenship sadtong 2022 bilang parte sang requirements sa iya appointment bilang public official.
“Respondent Incumbent Representative Erwin Teshiba Tulfo was prevented from assuming as Secretary of Social Welfare and Development on his questionable citizenship,” kabahin pa sa petisyon.
“Surprisingly, intriguingly if you like, despite that disqualification he was allowed to assume as a party-list nominee of ACT-CIS,” dugang sini.
Nahibaluan nga ini nga kongresista ang kabahin sang senatoriables nga gina-endorso ni President Ferdinand “Bongbong” R. Marcos Jr.
