Gintawag sang Malacañang nga “one-man fake-news factory” si anay Presidente Rodrigo Duterte matapos ang iya pahayag nga pakadto na sa diktadurya si President Ferdinand Marcos, Jr.
Sa statement nga ginpaguwa ni Executive Secretary Lucas Bersamin, Pebrero 23, ginlaragway sini ang pahayag ni Duterte nga isa na naman ka “budol”. Suno pa sa natungdan, ginakabig nila nga “baseless and ridiculous” ang amo nga pahayag.
“This hoax is another budol emerging from a one-man fake-news factory,” suno kay Bersamin. “We treat the former president’s baseless and ridiculous statements in the same way that Filipinos are dismissive of them: a tall tale from a man prone to lying and to inventing hoaxes,” kabahin pa sang statement.
Dugang pa ni Bersamin, nagapadayon gid ang Marcos administration sa pag-demonstar nga magapabilin ini sa pagtib-ong sa Konstitusyon sa pagsunod sa rule of law kag sa pagtahod sang kinamatarong sang mga tawo.
Ginsiling man sini nga indi sila magbalik sa mga pamaagi sang anay Duterte administration kun sa diin ginpangpreso ang mga kritiko kag ginpasakaan sang kaso, kag ginpaguwa pa ang “kill orders” nga daw nasadyahan pa.
“We will not backslide into the oppressive ways of the previous administration, when critics were jailed upon trumped-up charges and when kill orders were publicly issued with glee and obeyed blindly… It is the leader of that troubled past who is depicting us as veering toward a system where anyone can be deprived of life, liberty, and property without due process of law, as many had been on his mere say-so as a tyrant who did not respect the rights of the people.”
Ini nga mga statement sang Malacañang ang kasunod sa ginhambal ni Duterte sang rally sa Cebu sang Sabado kun sa diin ginpahayag sini nga nagaplano si Marcos nga ilugon ang iya amay kag magadeklarar man ini sang martial law para nga indi matabo ang 2028 presidential elections kag indi ini makapanaog sa pwesto.#
