Bisan nga ang impeachment kay Vice President Sara Duterte ang pinakamainit nga isyu subong sa Pilipinas, nagguwa sa isa ka Social Weather Stations (SWS) survey nga indi ini isa sa nagapanguna nga konsiderasyon sang mga Pilipino kun sin-o ang ila botohon sa 2025 midterm elections.
Base sa survey nga gin-komisyon sang Stratbase Group kag ginpatigayon sang nagligad nga Pebrero 15-19, 53% lamang sa respondents ang nagsiling nga magaboto sila sa kandidato nga maga-advocate sa patas nga trial kay Duterte sa impeachment court ukon sa Senado.
Ini ang pinakamanubo sa 15 ka mga isyu nga ginhatag sa survey respondents.
Base sa nasambit nga latest poll, ang nagapanguna kag pinaka-importante nga konsiderasyon para sa mga Pinoy amo ang agriculture, health care, employment kag education.
90% sa respondents ang nagsiling nga suportahan nila ang mga kandidato nga may kawsa sa pagtib-ong sang agrikultura kag magasiguro sang food security kag amo man ang magapabaskog sang health care system sang pungsod.
Ginasundan ini sang mga kandidato nga may kawsa sa pagpadamo pa sang job opportunities (89 percent), equal access to education (89 percent), workers’ rights and welfare (88 percent), pagtapna sa kapigaduhon kag gutom (83 percent) kag pag-address sa inflation (81 percent).
Ang iban pa nga nagapanguna nga konsiderasyon amo ang climate change (79 percent), national security kag sovereignty sa West Philippine Sea (77 percent), illegal drugs (77 percent) kag energy security kag paggamit sang renewable energy (75 percent).
Sa statement sang Stratbase, ginsiling nga ini nga resulta sang survey ang nagapakita kun ano subong ang mga prayoridad sang mga Pilipino.
Ini nga latest SWS survey ang may yara sang 1,800 respondents kag may margin of error nga plus/minus 2.31 percent.
